ዩኒኮድ ውረኒ ግን?

ዩኒኮድ ላፍደልድክ፡
ኣኻ ኮምፕዩተርልክ ኣኽን፡
ኣኻ ፕሮግራምልክ ኣኽን፡
ኣኻ ጋበልክ ኣኽን፡
ላዅ ፍሩግ ሺብ ደለምደኵ።

ኒሰረትልድ ኮምፕዩተራት ናከደምና ሺብዲ ግን። ፍደላትዲ አሪ እሻራትዲት ናላዅዲክ ላሺብሲ ረተቢነክ ገምደነኵ። ዩኒኮድ መሀድስጊር ጃብ እና ሺብ ነስ ረተብኒል ገሪው ሊኽድ ሺብስተው ናትናቱሩ ሽጚሰን (ኤንኮዲንግ) ደርፍፍ እርጉዅ። ኒስ ይናኻ ላሽጚሰና ኒቱሲ ኣቅተው እሻራት ጕዳዅ እርግላ። ህምቡንትክ ኤውሮጲ መቅሪሕ ኒቱሲ ካያ እን ጋብ ኒውሲ ናትክ አበድኒል ገሪው ናትናቱሩ ሽጚሰን ደርፍፍ ጀረብዱሉ እርጉዅ። ወላ ላጋብ እና እንግሊስ ጋብሰነድ ድኳ እን ፍደላት ናትክሲ እን ንቈጥ ክታበቱሲ ኒሰናኽር እን እሻራት ተክኒኩሲ ናትክ ላት ነፍዕስትኒል ላሽጚሰና ኒቱሲ ዓቅታዅ እርግላ።

እና ሽጚሰን ደርፍፍ ነን ኰዶ እኺሪርሊ ቄር ኣከና ሁመት ህምበኵ። ንሰና ኒኣክናኻ ለጛ ናትናቱሩ ሽጚሰን ደርፍፍ ናትናቱሩ ፍደላትድ ላጅንስ ሺብ ነፍዕስተና ሁመትሊ ወሪ ይኸ ናትናቱሩ ሺብሲ ላፍደሊ ነፍዕስተነሉ ሁመትሊ ግን። ኣኻ ኮምፕዩተርክ ትክሰኻ እብንዱት (ሰርቨርስ) ገሪው ናትናቱሩ ሽጚሰን ደርፍፍሲ ካብና ጀረብደኵሎም። ደአም ሓብረ (ዳታ) ናትናቱር ሽጚሰን ደርፍፍዲ ኮምፕዩተራትዲር ነበክድ ደኳዅሉ ሁመትሊ ደባለቅሶ ጂብኒ ጨገም እንትሮኽር ገረሰኵ።

ዩኒኮድ ኒስ ኒትክ ለወትዅሉ

ዩኒኮድ ኣኻ ኮምፕዩተርልክ ኣኻ ፕሮግራምልክ ኒሰናኽር ኣኻ ጋበልክ ላፍደልዲክ ላዅ ፍሩግ ሺብ ስኵሰኵ። እና ዩኒኮድሪ ደርብ ከደምኒዅ እን ንኪር ሁመትሊ አርእስተውዲ በህሊንዲ መርሐት ኢንዱስትሪሩ እና Apple, HP, IBM, JustSystem, Microsoft, Oracle, SAP, SUN, Sybase, Unisysዲ አሪውዲሲ ከለብርሶ መዓሊል እርገኵ እንኩዅ።ዩኒኮድ እና ሁመት ህምባዅ ጠለበሰና ናውቃምሲ ተከዉ ፈረው XML, Java, ECMAScript (JavaScript), LDAP, CORBA 3.0, WMLዲ ከብተውዲሲ ጀረብዳዅ ኣኩ ISO/IEC 10646ቲ እን ኒፍትሕ ገፍድ መዓሊል እርግሳዅሉ ግን። ዩኒኮድ ገሪው ኮምፕዩተርሲ መርሓው ፕሮግራማትዲ ብሮውሰራት (ብሮውሰርስ) ሓዳይስ ናዀርክዲ ኒሰናኽር አሪው ናትናቱሩ ፕሮግራማት ካበናዅ ግን። ዩኒኮድሪ ስታንዳርድ ኒሓወጭነዲ ኒድ ካበና እወው ዕደት አረርስናዲ እና ናንዲ ደበንሊ እዲና ኒድከል ትክሰ በርሆ ቋልስተው ሶፍትዌር እሻራትልድ ግን።

ዩኒኮድ ኔትወርክድ ከደመው ኮምፕዩተራትዲ ብሮውሰራዲት ላት ስኵስነድ ኣራኸስ ተኪን እን ከፈልሰውልድ ገሪዅዲክ ነቀስዶ እወኵ። ዩኒኮድ ላሶፍትዌር ምህርሲ ወሪ ላዅ ወንተብ ገሽሲ (ወብሳይት) ገሪ ኮምፕዩተራትዲ ጋብዲ ቅራናትዲሲ ሓዲስድ ጠፍሕድና ጀረብድጊሉ መዓሊል እርግስሮሉ ገረሰኵ። እን ሓብረትኽር (ዳታ) ላሪ ጨገም ጎፍይጊሎም ናትናቱር ደርፍፍድ ደኰሰና እሰኵ።

ዩኒኮድሪ ዲባ

ዩኒኮድሪ ዲባ መኽሰብ እንገት ከደማዅ ወጨም ግን። እና ዲባ ኒን ዩኒኮድሪ ዓቅምሲ ዳበርድናዲ እዳንድናዲ መዓሊል እርገሰና ሀብናዲር መታን ሰረትሳዅ ግን። ዩኒኮድ ክቱብ ኣዋኸ እን ሁመት ህምባኽድ ሶፍትዌር ምህርዲ ቅያስዲትል በንሲሮ ዋነትሉ የመመኵ። ዲቢዅራ ኣክና ገሪው ኮምፕዩተራትዲ ናዲ እንሸሸውሶ ፈረው ክደምዲት ዓመመው ሸሪካት በህሊንዲት ሻኾ ህምባዅ ግን። እና ዲባ ኒካብስታዅ እን ዲቢቊርልድ ፋው ምህርልድ ካያ ግን። እን ዲቢቍር ኣኽድኖ ጀረበው ሸሪካትዲ ናቱር ከውዲ ኒሰናኽር እን እዲና ኒድክሊ ህምበው ዩኒኮድሪ ውቃምሲ (ስታንዳርድ) ካበውዲ ኒኵጝንቲዲ ክድመትዲት ፈሀምሮ ጀረበውዲሲ ዩኒኮድሪ ዲቢዅራ ኣክኒ መራብ ብስታዅ ግን።

ሓብረትል ኰሳ፡ ተክኒኩዅ ቱሲሰነስ፡ ኒሰናኽር ነፍዓው ክማነሰ ቋሊ።

 

Blin translation by Tekie Alibekit (ተኪኤ ዓልበኪት)
Member of The Blin Language and Culture Association in Norway

---