[Unicode]  Hvað er Unicode? Home | Site Map | Search
 

Hvað er Unicode?

Unicode staðallinn úthlutar hverju skriftákni tölu,
sem er óháð tölvugerð,
sem er óháð forriti,
sem er óháð tungumáli.

Tölvur geta í eðli sínu aðeins unnið með tölur. Þær geyma bókstafi og önnur skriftákn með því að úthluta þeim tölu. Áður en Unicode kom til voru hundruð mismunandi túlkunarkerfa sem úthlutuðu þessum tölum. Ekkert eitt túlkunarkerfi gat innihaldið nægilegan fjölda skriftákna; t.d. þarfnast Evrópusambandið nokkurra mismunandi kerfa til að spanna öll tungumál þess. Jafnvel fyrir eitt tungumál, eins og ensku, var eitt túlkunarkerfi ekki nóg fyrir alla bókstafi, greinarmerki og algengustu einingatákn.

Túlkunarkerfin hafa einnig verið í andstöðu hvert við annað, þ.e. tvö kerfi geta notað sömu tölu fyrir tvö ólík skriftákn eða notað tvær mismunandi tölur fyrir sama táknið. Sérhver tölva þarf(sérstaklega miðlarar) að styðja margs konar túlkanir á stöfum; engu að síður er alltaf hætta á stafabrenglun þegar gögn fara á milli tölva og á milli mismunandi túlkunarkerfa.

Unicode breytir þessu öllu!

Unicode gefur hverju skriftákni eigin tölu sem breytist ekki eftir tölvugerð, forriti eða tungumáli. Unicode staðallinn hefur verið tekinn upp af forkólfum tölvuiðnaðarins; Apple, HP, IBM, JustSystem, Microsoft, Oracle, SAP, Sun, Sybase, Unisys og mörgum öðrum. Unicode er notað af nútímastöðlum eins og XML, Java, ECMAScript (JavaScript), LDAP, CORBA 3.0, WML, o.s.frv. og er hin opinbera leið til að útfæra ISO/IEC 10646. Unicode staðallinn er studdur af mörgum stýrikerfum, öllum nútímavöfrum og mörgum öðrum búnaði. Tilkoma Unicode staðalsins og búnaðar til að styðja hann eru veigamikil skref í þróun hnattrænnar tækni.

Að nota Unicode í notendamiðlurum eða í forritum og vefsíðum með mörgum notendaviðmótum býður upp á umtalsverðan sparnað, í samanburði við að nota eldri stafatöflur. Unicode leyfir einum forritapakka eða einni vefslóð að ná til margra tölvugerða, tungumála og landa án endurhönnunar. Unicode gerir gögnum kleift að ferðast gegnum mörg mismunandi kerfi án brenglunar.

Um Unicode samtökin (Consortium)

Unicode Consortium samtökin stefna ekki að hagnaði. Þau voru stofnuð til að þróa, útvíkka og koma á framfæri Unicode staðlinum, sem skilgreinir framsetningu á texta í nútímaforritapökkum og stöðlum. Meðlimir samtakanna eru fulltrúar margs konar fyrirtækja og stofnana í tölvu- og upplýsingaiðnaðinum. Samtökin hafa eingöngu tekjur af aðildargjöldum sínum. Fyrirtæki, stofnanir og einstaklingar hvar sem er í heiminum sem óska þess að aðstoða við útvíkkun og útfærslu staðalsins geta sótt um aðild að Unicode samtökunum.
Ítarlegri upplýsingar (á ensku) er að finna undir: Glossary, Technical Introduction og Useful Resources.

Icelandic translation by Þorgeir Sigurðsson