Que es Unicode?

Unicode assigna un numero unic a cata character,
independentemente de platteforma,
independentemente de programma,
independentemente de lingua.

Fundamentalmente, le computatores tracta solmente numeros. Pro immagazinar litteras e altere characteres in memoria, es necessari que a cata character sia assignate un numero. Ante le invention de Unicode, ha essite create centenas de systemas de codification differente. Necun de iste codificationes poteva continer characteres sufficiente pro tote le circumstantias. Solmente le Union Europee, per exemplo, require varie codificationes pro comprehender tote su linguas. Mesmo in le caso de un sol lingua, necun systema de codification coperiva tote le litteras, le signos de punctuation e le symbolos technic de uso currente.

In ultra, iste systemas de codification frequentemente es incompatibile inter se. Isto es, duo codificationes pote usar le mesme numero pro duo characteres differente, o usar duo numeros differente pro le mesme character. Le computatores, specialmente le servitores, debe supportar varie systemas de codification de characteres; quando le datos es transferite inter codificationes o platteformas differente, il ha sempre le risco de perdita de information.

Unicode cambia iste situation!

Unicode assigna un numero unic pro cata character, independentemente de platteforma, independentemente de programma, independentemente de lingua. Le Standard Unicode ha essite adoptate per leaders de mercato como Apple, HP, IBM, JustSystem, Microsoft, Oracle, SAP, Sun, Sybase, Unisys e multe alteres. Unicode es exigite per standards moderne como XML, Java, ECMAScript (JavaScript), LDAP, CORBA 3.0, WML, etc., e constitue le implementation official de ISO/IEC 10646. Illo es supportate per multe systemas operative, tote le navigatores moderne, e multe altere productos. Le emergentia del Standard Unicode, e le disponibilitate de instrumentos que lo supporta, es un del plus significante tendentias del informatica mundial actualmente.

Le incorporation de Unicode in applicationes cliente/servitor, systemas distribuite o sitos del web permitte un reduction significative de costos in contrasto con le utilization de collectiones de characteres traditional.Gratias a Unicode, un sol version de un producto de software o de un sito del web pote satisfacer simultaneemente e sin modification le demandas de varie platteformas, linguas e paises. Unicode tamben permitte que datos de provenientia variate pote esser excambiate sin risco de perdita de characteres.

Le Consortio Unicode

Le Consortio Unicode es un organization sin scopos lucrative fundate pro disveloppar, extender e promover le uso del Standard Unicode, que specifica le representation de texto in productos e standards moderne. Le membros del consortio representa un ample gamma de interprisas e organizationes in le dominio del informatica e del technologias de information. Le consortio es financiate exclusivemente per le quotizationes de su membros. Le adhesion al Consortio Unicode es aperte a organizationes e individuos de tote le mundo qui desira supportar le Standard Unicode e participar de su extension e implementation.

Pro informationes ulterior, vide (in anglese) le glossario, un introduction technic e ressources utile.

Interlingua translation by Emerson Costa

---